11/29/2018

Oos-Kaapse broodboom

Encephalartos altensteinii

Soos die naam voorstel kom die Oos-Kaapse broodboom voor vanaf Oos-Londen tot by die grens van KwaZulu-Natal. Daar is afsonderlike manlike en vroulike plante. Dit is een van Suid-Afrika se 28 soorte sikadeë wat streng beskerm word.

Die struik of boom wat tot 7 meter hoog kan word. Dit het groot stywe, saamgestelde blare wat tot 3,5 meter lank word. Groepe geelgroen keëls ontwikkel uit die stam.

11/22/2018

Begin jou eie groentetuin

Almal wil deesdae ’n groentetuin hê – ’n paradys in die kleine waar jy groente en kruie kan oes wat veel varser, voedsamer, en bowenal lekkerder is as enigiets wat jy in ’n winkel kan koop.

Begin jou eie groentetuin is ’n allesomvattende praktiese gids om hierdie droom ’n werklikheid te maak. Hierdie boek sal jou die volgende leer: alles begin by goeie, gebalanseerde grond – ons wys jou hoe jy jou grond kan toets en rég voorberei; hoe om ’n organiese groentetuin volgens jou spesifieke omstandighede te beplan; hoe om self kompos en grondmengsels te maak en beddings en potte rég voor te berei; hoe om saaipotjies van koerantpapier te maak wat jy net so kan plant; hoekom oopbestuifde en erfenissaad die beste werk (en hoe jy saad kan oes en bêre); hoe om reg water te gee en selfs gryswater te gebruik; hoe om ’n wurmplasie of bokashidrom te begin waarmee jy jou plante woema kan gee (en minder vullis stortingsterrein toe stuur); hoe om peste en plae op die organiese manier te beheer; watter groente die beste vaar in sand- of kleigrond, volson of half- en spikkelskadu, hitte- en droogtetoestande, beddings of potte, gryswater duld of nie ...



Begin jou eie groentetuin / deur Peter van Noord & Johan van Zyl -- Human & Rousseau, 15 November 2018 -- 192 p. ; sagteband. -- ISBN 9780798176354 : R 325.00




Begin jou eie groentetuin
Bettie Blom
23 November 2018

2.5

11/15/2018

Essenhout

Ekebergia capensis

’n Middelslag- tot groot boom, immergroen of half-bladwisselend in kouer dele. Dit kom voor van Limpopo, Mpumalanga, KwaZulu-Natal tot in die Oos-Kaap.

Dit kan tot 10 meter hoog word met ’n spreiende kroon – dus ’n uitstekende skaduboom.

Die blare is blink en donkergroen. Die blomme is onopvallend, maar dit ruik baie lekker. Dit dra helderrooi bessies wat baie gewild is onder voëls. Die boom blom in die lente en die bessies verskyn in die somer en herfs.

11/08/2018

Bredasdorp

Dymondia margaretae

Daar is net een Suid-Afrikaanse soort in dié genus en dit is vernoem na die dorp waar dit voorkom, Bredasdorp.

Dit is ’n plat plantjie. ’n Immergroen, kruidagtige meerjarige met klein blougroen blaartjies met piepklein geel blommetjies wat in die lente verskyn.

Die plant is redelik bestand teen droogte en is ’n uitstekende dekplant. Die plantjie moet goeie dreinering hê.

11/01/2018

Pistoolbos

Duvernoia adhatodoides

Die pistoolbos kom voor in KwaZulu-Natal en die Oos-Kaap. Dit word tot 3 meter hoog en het wit blomme wat baie lekker ruik.

Die naam kom van die knalgeluid waarmee die ryp vrugte oopbars om die sade weg te skiet van die moederplant.



Blomme van 'n pistoolbos in Walter Sisulu Nasionale Botaniese Tuin (foto: C. Chen)

10/25/2018

Bokbaaivygie

Dorotheanthus bellidiformis

Hierdie eenjarige vetplantjies groei wild in dele van die Suidwes-Kaap waar hulle skitterend vertoon met hul lenteblomme in alle skakerings van rooi, pienk, pers, oranje, appelkoos en room.

Die plante groei maklik van saad.



(foto: Craig Franklin)